1. Талабалар ўқишини қайта тиклаш бўйича аризалар ким томонидан кўриб чиқилади? Бир ОТМ доирасида ўзаро мос ва турдош йўналишлар бўйича ўқишни қайта тиклаш ректор буйруғи билан амалга оширилади. Қуйидаги ҳолларда ўқишини қайта тиклаш ОТМ бўйсунадиган вазирлик қарори билан амалга оширилади: — мос ва турдош йўналишлар бўйича бир вазирликка қарашли бошқа ОТМга (масалан, Миллий университетдан Техника университетига қайта тиклаш, ҳар иккала университет Олий таълим, фан ва инновациялар вазирлигига қарашли); — мос ва турдош йўналишлар бўйича турли вазирлик доирасида бир ОТМдан бошқа ОТМга (масалан, Адлия вазирлигига қарашли Тошкент давлат юридик университетидан Ташқи ишлар вазирлигига қарашли Жаҳон иқтисодиёти ва дипломатияси университетига). Қуйидаги ҳолларда ўқишни қайта тиклаш Давлат комиссияси қарори билан амалга оширилади (комиссия таркиби бу ерда): — хорижий ОТМлардан Ўзбекистон ОТМларига; — ҳар қандай ҳолатда турдош бўлмаган таълим йўналишларига ва мос бўлмаган мутахассисликларига. 2. Аризалар қачон берилади? Ўқишни қайта тиклаш бўйича аризалар бир йилда икки марта қабул қилинади:

• кузги семестрга қайта тиклаш бўйича ариза топшириш – 15 июлдан 5 августгача;
• баҳорги семестрга қайта тиклаш бўйича ариза топшириш – 15 январдан 25 январгача давом этади.

Аризалар кўриб чиқилиб ўқишга тиклаш ёки рад этиш бўйича қарор:

• кузги семестрга учун – 5 августдан 30 августгача;
• баҳорги семестр учун – 25 январдан 15 февралгача қабул қилинади.

3. “Бюджет”да ўқиганлар ўқиши “бюджет” асосида тикланадими? Барча ўқиш шакллари бўйича ўқишни қайта тиклаш тўлов-контракт асосида амалга оширилади. Аввал “бюджет”да ўқиган қуйидаги талабаларнинг ўқиши “бюджет” шаклида тикланиши мумкин:

• етимлар ҳамда I ва II гуруҳ ногиронлиги бўлган шахслар;
• муддатли ҳарбий хизматни ўтаган, академик таътилдан ўз вақтида қайтганлар;
• давлат буюртмаси билан хорижга ўқишга юборилган ва белгиланган муддатда қайтган талабалар.

4. Ўқишни бошқа ОТМга қайта тиклаганда аввал ўқиган ОТМдан розилик олинадими? Йўқ, талаба ўқишини бошқа ОТМга кўчириб қайта тиклашда у илгари таълим олган ОТМ розилиги талаб этилмайди. Ўқишдан четлатилганлигига 5 йилдан 10 йилгача муддат бўлганда талабалар ўқишини қайта тиклаш ОТМ бўйсунувидаги вазирлик ва идоралар рухсати билан амалга оширилади. Ҳарбий хизматда бўлганлик, 3 ёшгача болаларни парвариш қилиш билан боғлиқ меҳнат таътили ҳамда соғлиқни қайта тиклаш вақтлари ушбу муддатга кирмайди. 5. Ариза қандай ҳолатларда рад этилиши мумкин? Қуйидаги ҳолатларда ўқишни қайта тиклаш бўйича аризалар рад этилиши мумкин:

• аккредитацияга эга бўлмаган хорижий ОТМда ёки уларнинг филиалларида ўқиганлар;
• мавжуд таълим шаклидан бошқа таълим шаклида ўқиганларга;
• ОТМнинг марказлари, бўлимлари, ўқув-маслаҳат пунктлари ва бошқаларда ўқиганларга;
• ОТМда мос таълим йўналиши ёки шакли бўлмаганида, фанлар бўйича фарқлар 4 тадан ошганда;
• контракт асосида ўқиётганлар тўловни ўз муддатида тўламаганда;
• грант билан тиклаш учун бўш ўринлар бўлмаганида;
• ОТМ моддий-техника базаси имконияти чекланганда;
• мақсадли қабул қилинганлар бошқа таълим йўналишига, бошқа олий таълим муассасасига қайта тикламоқчи бўлганда;
• кечки таълимдан сиртқи таълимга ҳамда кечки таълимнинг бир таълим соҳасидан иккинчи таълим соҳасига;
• сиртқи таълимдан кундузги таълимга ҳамда сиртқи таълимнинг бир таълим соҳасидан иккинчи таълим соҳасига;
• бир таълим шаклидан махсус сиртқи таълим шаклига ҳамда махсус сиртқи таълим шаклидан бошқа таълим шаклига.

Дилмурод Ражабоев, Hudud24.uz колумнисти